Mat 23 | MED | STEP | Ei kᵾn, Jisas ndi, wamp minal morung nimba kᵾn, elim nga kitip kᵾni wu nimbᵾ kᵾn, kundpa nimba mel, “Mi Ik mbo wu mbᵾ kᵾn, Perisi wu na mbᵾ, Moses nga koⱡ ila molk mi ik mbo endᵾtᵾng.

Matthew 23

Jisas Ndi, Mi Ik Mbo Wu Na Perisi Wu Na Mbᵾ Nga Tᵾk Mendᵾk Muⱡᵾi Nitim.

1 Ei kᵾn, Jisas ndi, wamp minal morung nimba kᵾn, elim nga kitip kᵾni wu nimbᵾ kᵾn, kundpa nimba mel, “Mi Ik mbo wu mbᵾ kᵾn, Perisi wu na mbᵾ, Moses nga koⱡ ila molk mi ik mbo endᵾtᵾng. 3 Wote, enim ik kundᵾk, nᵾng mbᵾ, kum tek pilᵾi! Wote, uⱡ eing mel, iti nᵾtᵾi! Ei nambuⱡ emel, en enim, wote uⱡ etmin ei mel iti natᵾtmᵾn. 4 Perisi na, mi ik mbo wu mbᵾ ndi, mel mbun itmbᵾⱡ tᵾk, wamp mi ui nᵾk, wote en enim ndi, tᵾk rᵾpndi napᵾndᵾrmᵾn. 5 En enim nga uⱡ etmin mbᵾ, wamp mbᵾ ndi, kandᵾk neing nᵾk etmin. Got nga ik mong mbᵾ, mon rok, mᵾi ombil ila pendᵾk, ki oⱡa mondᵾk, wote muⱡ roⱡ mbᵾ nuim kan ila rumbᵾⱡ nga mba, met kᵾmp puⱡ ila purum mbᵾ, kandᵾk neing nᵾk etmin. 6 Wote, rᵾng ou mat karmin ei kᵾn muna, manga wingti mbila puk, rat pol kuimbal mint muⱡing ei nga kai pilik, wote rᵾng rarᵾp kona na, wamp molk etmin mbila, en enim, ‘Ik Mbo Wu,’ mbᵾ, nᵾk tᵾk ou nduk, rawe iteing nᵾk pᵾtmᵾn. 8 Ei kᵾn, enim kundᵾk, ‘Ik Mbo Wu,’ ni nᵾneing. Ei nambuⱡ emel, enim wu ᵾngᵾn ᵾngᵾn kᵾⱡ, enim nga ik mbo wu tenda ei morum. 9 Ya mᵾi kona ila enim ndi, wu ti kundᵾk, ‘Wuta,’ ni nᵾnᵾi! Ei nambuⱡ emel, enim nga tipanᵾm wu tenda ei, oⱡa muⱡ ila morum. 10 Muna nim, ‘Ik Mbo Wu,’ ei, ni nᵾnᵾi! Ei nambuⱡ emel, nim nga ik mbo wu tenda ei, oⱡa muⱡ ila morum ei Kraist. 11 Ei kᵾn, enim nga rᵾk ting ila wu nuim kuimbal ti moⱡum ndam, elim mepa mana omba, kongun wu raⱡpa muⱡangga! 12 Wamp nam ti ndi, elim nuim muⱡimp nimba pilpa, em wamp ti, Got ndi, mepa mana omba. Wote wamp ti, elim nga orunga mepa mana omba moⱡum wamp ei, Got ndi, etpa wamp nuim mondᵾmba.

Jisas Ndi, Perisi Wu Na Mi Ik Mbo Wu Mbᵾ Uⱡ Kit Mat Elinga Ik Ngurum

13 “Enim kun kai rᵾl wu Perisi wu na, mi ik mbo wu na mbᵾ, mbun mindil nuing an! Enim ndi, wamp mbᵾ, Got nga wamp tᵾpa mumuk rui uⱡ ila rukrᵾng ping ormᵾn mbᵾ, mi pendᵾtmᵾn. Wote, en enim kep, ila rukᵾr pi nᵾping ei nga, mbin nᵾk ormᵾn wamp mbᵾ, mon ku nᵾtmin.

[ 14 “Enim kun kai rᵾl wu Perisi na, mi ik mbo wu na mbᵾ mindil nuing an! Ei nambuⱡ emel, enim amp wiya na mbᵾ nga manga mbᵾ, kᵾndᵾp nok tᵾk, wote uⱡ etmin mbᵾ kamblik pendᵾk, atinga roⱡ mbᵾ rok etmin. I etmin uⱡ ila, Got ndi, enim mindil mam ti ngumba.] 15 Enim kun kai rᵾl Perisi wu na, mi ik mbo wu na mbᵾ nga mindil nuing an! Ei nambuⱡ emel, ik mbo wu tenda ti endᵾk, enim nga kitip kᵾni wu runding ei nga nu komnga mbᵾ, puⱡa rok kurᵾk angᵾndᵾrmᵾn. Wote, ti kandᵾk tilingina omba, enim nga kitip kᵾni wu rarum. Wote, enim etmin uⱡ mbᵾ etpa, wote wu ei, ndip kona ila mba mindil nomba. Wote, enim nuing ei mel mon, mindil mam ti nomba.

16 “Enim mong ti wu mat ndi, mat ki amᵾnmᵾn ei nga, na kont enim ei ka! Enim ndi, ‘Wamp ik mbo ei mel endᵾtmin. Wamp ti ndi, mi tepa, Got kᵾn mel ti nguimp nimba, manga wingti ou ei, mbi tem ndam, mi tepa nᵾtᵾm ik ei nga muⱡ ti mon. Muna manga wingti ila ku gol morum ei nga ti, mbi tepa angᵾndpa, elim nga mi ik ei, ronduⱡ pangga nim ndam, elim itimp nim mi ik ei mel etpa muⱡ indangga,’ nᵾtmin. 17 Enim mong ti, wu kekilip mbᵾ ye! Mel nant ei mel muⱡ? Gol ei mel muⱡ muna, manga wingti ei ndi, ku gol ei etpa Wingti randrum uⱡ ei muⱡ? 18 Enim ik ti mbo endᵾk, ‘Wamp ti ndi, elim nga nᵾnt ik ei, ronduⱡ pangga nimba rat pol wingti ei, mbi tem ndam, elim nga mi tem ik ei nga ronduⱡ ti mon. Muna rat pol wingti ila gem ngui mel ti, tem ei nga mbi tepa, elim nga ik ei, ronduⱡ pangga nimba nim ndam, elim itimp nimba mi tepa nim ik ei, etpa muⱡ indangga!’ nᵾtmᵾn. 19 Enim mong ti wu mbᵾ ye! Uⱡ nant ei uⱡ muⱡ? Rat pol Wingti ila gem ngui mel ei telmina, wingti rarum uⱡ ei ronduⱡ muna, gem ngormᵾn ei ronduⱡ? 20 Ei kᵾn, wamp nam ti ndi, rat pol wingti ila mi tepa ik ti nim ndam, rat pol wingti ei kᵾn, oⱡa pol ila mel gem mbᵾ kᵾn, pᵾkᵾ mi tetᵾm. Wote, wamp nam ti ndi, manga wingti ei kᵾn, mi tepa ik ti nim ndam, manga wingti ila mukᵾr tetᵾm mel mbᵾ kᵾn, wote Got manga Puⱡ Wu ila morum ei kᵾn, mi tepa nᵾtᵾm. 22 Wote, wamp nam ti ndi, oⱡa muⱡ kona ei kᵾn, mi tepa ik ti, nᵾmp ronduⱡ mundimp nimba mbi tem ndam, wamp ei, Got nga rᵾpndi pol morum kona ei kᵾn, wote Got elim kᵾn kunda mi tetᵾm.

23 “Enim kun kai rᵾl Perisi wu na, mi ik mbo wu na mbᵾ nga, na kont enim ei ka! Nambuⱡ emel, pana enim kim mbᵾ nga kᵾmp tᵾk ki ti, gu nduk, Got kᵾn gem nguimin nᵾk ekit tᵾk tᵾndᵾtmin. Wote, ya mi ik peng mbᵾ, tᵾk pei mundᵾrmᵾn. Ik mbᵾ, wamp kᵾn ik kupa ni uⱡ na, mᵾn kan mundi uⱡ na, mondpa pili uⱡ na, kᵾⱡ pep rui narᵾrmin. Ya mi ik peng kᵾⱡ pep rokᵾn mel, wote mi ik kat wak rui nᵾri. 24 Enim mong ti, rᵾp wu mbᵾ ye! Enim nga nu ming ila oⱡma ei petᵾm nᵾk tᵾk mundᵾrmᵾn. Wote, kng kamel ei, pendᵾk normin uⱡ ei pili napᵾtmin.

25 “Enim kun kai rᵾl Perisi wu na, ik mbo wu na mbᵾ nga, na kont enim ei ka! Nambuⱡ emel, enim nga ming kap mbᵾ ekit orunga, ⱡumᵾi rok kai etmin. Wote, ming rukᵾr orunga na mbᵾ, punt mong kandᵾk tᵾk etmin uⱡ mbᵾ nga ⱡar minal morum. 26 Enim mong ti Perisi wu mbᵾ ye! Enim ming rukᵾr orunga, unt kuimp tek ⱡumᵾi rangina kᵾn, wote ekit orunga mbᵾ, kunda eng numba!

27 “Enim kun kai rᵾl Perisi wu na, mi ik mbo wu na mbᵾ nga, na kont enim ei ka! Nambuⱡ emel, nim wamp on kona ti, ou nduk, kai etᵾk tetmin ni mel kapⱡa. Oⱡa mᵾi pol ei, etᵾk mon mundᵾk tetmin. Wote wamp on kona rukᵾr orunga mbᵾ, wamp ombᵾl kᵾn, mel puri na mbᵾ, peka ropa tetᵾm ni mel kapⱡa. 28 Ei mel ku, enim nga kᵾng ekit orunga wamp ndi, kᵾning ei nga etᵾk kai mondᵾrmᵾn. Wote, enim nga numan ei ik kep kᵾn, uⱡ kit etmin mbᵾ nga peka ropa petᵾm.

29 “Enim kun kai rᵾl Perisi wu na, mi ik mbo wu na mbᵾ nga, na kont enim ei ka! Nambuⱡ emel, enim Painui wu mbᵾ nga wamp on kona mbᵾ, etᵾk kai mondᵾrmᵾn. Wote, wamp kai mat molk korung mbᵾ nga on kona mbᵾ, ou ndurmᵾn. 30 Wote enim ndi, nᵾk mel, ‘Tᵾn nga anda kouwᵾ kᵾⱡ, unt morung ui ila, tᵾn moⱡmina ndam, uⱡ ⱡawa etᵾk, wote painui wu kᵾⱡ, rok kondᵾk etᵾng uⱡ mbila, tᵾn nga ki ti ila rᵾk pi napᵾⱡnga,’ nᵾtmin. 31 I nᵾnmᵾn ik ei ndi, nᵾk mot nduk, unt wu kit kat molk, painui wu mbᵾ, rok mema oi ndurᵾng wu kᵾⱡ nga mema tenda kᵾⱡ, en enim namin. 32 Ei kapⱡa kᵾn, anda tᵾpanᵾmᵾl kᵾⱡ, puⱡ mondrung uⱡ nit ment ei, enim etᵾk pora ndᵾi! 33 “Enim wimbᵾ kit mbᵾ ye! Enim Got ndi, tᵾpa ndip mam ila rukᵾr ndumba ei kᵾn, enim nᵾng nᵾk ok ping ei? 34 Ei kᵾn, akup kum tᵾi! Na ndi, painui wu mat kᵾn, wu pilpa kungᵾndi mat kᵾn, ik mbo wu mat kᵾn, tᵾp enim kᵾn mundimp. Wu mbᵾ nga mat enim ndi, rok kunding. Mat nde peta ila ruing. Mat imp molk mek puk, atinga manga kel mbila mondᵾk, tᵾmbᵾⱡ ndi ruing. Mat pep rok mek puk, kona peng mbila puk, mbila puk iting. 35 I etᵾk, wu nit mul nᵾmbil mbᵾ, rok kunding ei nga puⱡ ei omba, enim kᵾn pemba. Wu nit mul nᵾmbil, Eipel rok kondrung ui ei kᵾn omba, wote wu Berakaiya kangᵾm Sakaraiya ni, manga wingti ei kᵾn, rat pol wingti ei nga rᵾk ila, rok kondᵾk tetᵾng ei nga uⱡ mbun ei, pᵾi enim ting. 36 Enim ik kupa ei, kundᵾp nᵾnt. Uⱡ i etᵾng kᵾⱡ nga mbun ei, akup ui ila wamp kalk tᵾnmᵾn mbᵾ kandᵾk ting.

Jisas Ndi, Jerusalem Wamp Mbᵾ Numan Ngorum

37 “Jerusalem, Jerusalem! Nim Got ndi, painui wu tᵾpa mundrum mbᵾ, rok kondkᵾn, nombuⱡa rung wu na mbᵾ, ku ndi rokᵾn ku etᵾn. Kᵾi kulda mam ei ndi, elim nga waⱡ mbᵾ, pou mana orunga mondrung ei mel, na nga ki raⱡ ndi, nim nga wamp mbᵾ ambᵾⱡᵾp rᵾk timp nᵾmp ent. Ei wote, nim ei ndi, mon ku nᵾtᵾn ei ka! 38 I etᵾn uⱡ ei ndi, nim nga manga wingti ei, pi muⱡangga, kona ei wapra temba. 39 Enim ik ti kundᵾp namp, akup ui ila kᵾn, yant nduk molk, ping ila na kᵾni nakᵾndᵾk, wote molk puk, ui tila, ‘Nuim ei nga mbi ila onum ei, Got ndi, memp pindangga,’ nᵾng ei kᵾn, mint na kᵾning,’” nitim.